Home » images »

Waziri Muhongo akutana na Rais wa Kampuni ya TBEA ya China

 

Waziri wa Nishati na Madini, Profesa Sospeter Muhongo amekutana na Rais wa Kampuni ya TBEA ya China, Zhang Xin kwa ajili ya kujadili masuala ya uwekezaji kwenye Sekta ya Nishati nchini.

Waziri wa Nishati na Madini, Profesa Sospeter Muhongo (kushoto) akipeana mkono na Rais wa Kampuni ya TBEA ya China, Zhang Xin.

Mkutano huo wa Waziri Muhongo na Rais huyo ambaye ameongozana na Ujumbe wake umefanyika Mei 21, 2017 jijini Dar es Salaam na kuhudhuriwa na Wataalamu kutoka Wizara ya Nishati na Madini na Wizara ya Mambo ya Nje na Ushirikiano wa Afrika Mashariki.

Waziri Muhongo aliuelezea ujumbe huo baadhi ya fursa za uwekezaji kwenye Sekta ya Nishati nchini na kuwashauri wachague eneo ambalo wanahitaji kuwekeza ili taratibu zianze mapema.

Waziri wa Nishati na Madini, Profesa Sospeter Muhongo (kushoto) akimsikiliza Rais wa Kampuni ya TBEA ya China, Zhang Xin (hayupo pichani).

“Fursa ni nyingi sana, ni nyinyi kuamua wapi mmelenga ili taratibu ziendelee ikizingatiwa kwamba dhamira ya Serikali ni kuhakikisha tunakuwa na Tanzania ya Viwanda,” alisema Waziri Muhongo.

Aliagiza wataalamu wa Wizara ya Nishati na Madini kukutana na Ujumbe huo ili kujadili kwa undani dhamira yao ya uwekezaji ikiwemo kuchagua eneo ambalo wangependa kuwekeza.

Rais wa Kampuni ya TBEA ya China, Zhang Xin (wa pili kulia) akizungumza kwenye mkutano na Waziri wa Nishati na Madini, Profesa Sospeter Muhongo (hayupo pichani).

Kwa upande wake Xin alisema kampuni yake inaridhishwa na kasi ya Serikali ya Tanzania chini ya Uongozi wa Rais John Pombe Magufuli na hivyo wanatarajia kuwekeza kiasi cha Dola za Marekani bilioni 10 kwenye sekta mbalimbali ikiwemo ya Nishati, Barabara, Uendelezaji wa Miji, na Usafirishaji.

Alisema uchumi wa Tanzania umezidi kuimarika na hivyo kuzidi kuvutia wawekezaji katika miradi mbalimbali hususan ikizingatiwa kuwa Tanzania ni Taifa lenye Amani na ambalo linakuwa kwa kasi kubwa.

Ujumbe huo upo nchini Tanzania na unatarajia kukutana na Wizara mbalimbali ili kubaini fursa za uwekezaji.

Imeandaliwa na:

Mohamed Saif,

Afisa Habari,

Wizara ya Nishati na Madini,

5 Barabara ya Samora Machel,

S.L.P 2000,

11474 Dar es Salaam,

Simu: +255-22-2121606/7, Nukushi: +255-22-2121606,

Barua Pepe: info@mem.go.tz,                                                                               

Tovuti: mem.go.tz